Зимни нишасти хабарӣ оид ба ҷамъбасти натиҷаҳои фаъолият дар нимсолаи аввали соли равон сардори Раёсати ВКД ҶТ дар вилояти Суғд генерал-майор Шариф Назаров аз афзоиши мизони ҷинояткорӣ дар минтақаи шимоли ҷумҳурӣ изҳори нигаронӣ намуд.
Ба гуфтаи ӯ, дар зарфи 6 моҳи соли равон дар қаламрави вилоят 2 ҳазору 391 ҷиноят ба қайд гирифта шудааст, ки нисбат ба нимсолаи аввали соли гузашта 363 ҷиноят зиёдтар аст.
Ш.Назаров зикр кард, ки дар ин давра 25 далели одамкушӣ (ҳамин давраи соли 2012 – 18 далел) ба қайд гирифта шудааст, ки дар 23 ҳолат ин ҷиноятҳо ошкор гардидаанд.
«Ҷиноятҳои қатли оилаи Бобоевҳо иборат аз 5 нафар дар ноҳияи Бобоҷон Ғафуров ва посбони «Амонатбонк» дар ноҳияи Ашт то ҳол нокушода боқӣ монда, корҳои фавриву ҷустуҷӯӣ оид ба ошкор сохтани афроди ба ин ҷиноятҳо дастдошта идома дорад», – иброз дошт сардори Раёсати ВКД ҶТ дар вилояти Суғд.
Ҳамчунин зикр гардид, ки мизони ошкорсозии ҷиноятҳо дар ин давра 93,76%-ро ташкил додааст.
