Дар бозори «20-солагии истиқлолият»-и шаҳри Хоруғ сӯхтор сар зад.
Тавре ба Хабаргузории «Азия-Плюс» дар Сарраёсати хадамоти сӯхторнишонии Вазорати корҳои дохилии кишвар иттилоъ доданд, соҳибкорон бо қувваи худ кӯшиши хомӯш кардани оташро кардаднд. Аз ин рӯ ба хадамот танҳо пас аз 40 дақиқаи сар задани сӯхтор, соати 14:50, хабар доданд.
«Бо ҳамин сабаб замони ба ҷойи ҳодиса расидани мошинҳои оташнишонӣ аллакай 800 метри мураббаи бозор ба коми оташ рафта буд ва дар маҷмӯъ моли 100 нуқтаи савдо сӯхт», – қайд кард сарчашма.
Дар хадамот иттилоъ доданд, ки ба ҷойи ҳодиса чор мошини оташнишонӣ сафарбар шуданд, ки дар натиҷаи корҳои фаврӣ паҳншавии минбаъдаи оташ пешгирӣ шуда, дар дваоми 3 соат он пурра хомӯш карда шуд.
Тибқи маълумоти пешакӣ, зарари сӯхтор ба 600 ҳазор сомонӣ мувофиқ аст. Ба миқдори 2 млн. сомонӣ моли савдошаванда халос карда шуд . Сабабҳои сӯхтор тафтиш карда мешаванд.
