Ба муносибати таҷлили ҷашни касбии Рӯзи авиатсияи гражданӣ ҶСК «Тоҷик Эйр» боз як ҳавопаймои навъи «Боинг»-ро дастрас намуда, нимаи аввали дирӯз он ба майдони ҳавоии Душанбе фуруд омад.
Бино ба маълумоти хадамоти матбуоти ширкати ҳавопаймоӣ, ҳавопаймои мазкур бар асоси лизинги молиявӣ дар доираи барномаи солимгардонии ширкати ҳавопаймоии «Тоҷик Эйр» харидорӣ шудааст.
«Ҳавопаймои «Боинг 737-400» насли заминавии оилаи ҳавопаймоҳои 737 Classic буда, бо 162 ҷойи нишаст барои хатсайрҳои ҳавоии масофаи миёна ва дур пешбинӣ шудааст», – хабар медиҳад хадамоти матбуоти ширкат.
Дар ҶСК «Тоҷик Эйр» ба муносибати 89-уми солгарди таъсисёбии авиатсияи граждании ҶТ ҳамчунин маҷлиси тантанавӣ доир гардида, кормандони пешсаф бо унвонҳои баланди собиқадори авиатсия ва ифтихорномаҳо сарфароз гардонида шуданд.
