Филми кӯтоҳмуддати «Муттако» ба ҷоизаи кинофестивали «Нигоҳи баробар» бахшида ба ҳаёти одамони имкониятҳои ҷисмониашон маҳдуд соҳиб гардид.
Тавре ба ОИ «Азия-Плюс» раиси Иттиҳоди миллии созмонҳои волидони кӯдакони имкониятҳояшон маҳдуди ҶТ Сабоҳат Ҳакимзода хабар дод, филм аз ҷониби ТҶ «Падару модарони кӯдакони дорои мушкилот дар рушд»-и шаҳри Хуҷанд таҳия шудааст.
«Ба ҷоизаи дуюми кинофестивал филми кӯтоҳмуддати «Шукрона»-и аз ҷониби Ассотсиатсияи волидони кӯдакони дорои имконияти маҳдуд (шаҳри Душанбе) таҳияшуда ва ба ҷоизаи сеюм филми «Рядом с тобой»-и ТҶ «Имконият» сазовор дониста шуданд», – иброз дошт С.Ҳакимзода.
Ба қавли ӯ, дар ҳамаи ин филмҳо аз рӯзгори кӯдаконе ҳикоят карда мешавад, сарфи назар аз имкониятҳои маҳдуду маъюбӣ, фаъолона дар ҳаёти ҷомеа ширкат меварзанду ба комёбиҳо ноил мегарданд, ки дигар кӯдакони дорои имкониятҳои маҳдудро ба ин амал мусоидат мекунанд.
Кинофестивал аз ҷониби Иттиҳоди миллии созмонҳои волидони кӯдакони имкониятҳояшон маҳдуди ҶТ бо кӯмаки молиявии Институти «Ҷамъияти Кушода» – Бунёди Мадад дар Тоҷикистон ва Барномаи шабакавии дастгирии таҳсилоти Лондон/Будапешт созмон дода шуд.
Гуфта мешавад, ҳадафи кинофестивали мазкур тавассути навору филмҳои кӯтоҳ ҷалб кардани таваҷҷуҳи ҷомеа ба проблемаҳои одамони имкониятҳояшон маҳдуд ва нишон додани қудратмандии онҳо дар талоши зиндагӣ мебошад.
Дар кинофестивал ролику филмҳо дар бораи одамони имкониятҳояшон маҳдуд, ки дар Тоҷикистону Қирғизистон ва Қазоқистону Русия наворбардорӣ шудаанд, намоиш дода шуда, тамошобинон имконият пайдо намуданд, ки бо қаҳрамонҳои асосии филмҳо, ки дар чорабинии мазкур ҳузур доштанд, бевосита муколама кунанд.
