Рӯзи душанбеи ҳамин ҳафта раиси ҲНИТ Муҳиддин Кабирӣ ва ҳуқуқшинос Ойниҳол Бобоназарова, номзади пешбаришуда аз ҲНИТ ба мансаби президенти Тоҷикистон дар кори конфронси байнулмилалӣ таҳти унвони «Бедории исломӣ дар Осиёи Марказӣ» дар Бишкек ширкат варзиданд.
Дар пойтахти Қирғизистон Муҳиддин Кабирӣ ва Ойниҳол Бобоназарова бо муҳоҷирони тоҷики муқими шаҳри Бишкек ва ҳамчунин вакили парлумони Қирғизистон Турсунбой Боқируғлу дидору гуфтушунид анҷом доданд.
Бино ба иттилои сомонаи расмии ҲНИТ, зимни суханронӣ дар конфронс М.Кабирӣ зикр кардааст, ки «мо аз натиҷаи интихобот руҳафтода нестем ва касоне, ки барои як интихобот ва ё як шахс ба саҳна меоянд, сиёсат ҷои онҳо нест».
Ба иттилои манбаъ, зимни мулоқот бо муҳоҷирон О.Бобоназарова бо лаҳни танзомез гуфтааст: «Хайрият, Вазорати дифоъ тонкҳояшро набаровард, дигар ҳама вазорату ниҳодҳои хукуматӣ муқобили мо буданд. Бинобарин, 202 ҳазор имзо барои ман хеле боарзиш аст».
