Рӯзи 13-уми декабри соли 2013 дар Вазорати корҳои хориҷии Ҷумҳурии Тоҷикистон маросими ба имзорасонии Ёддошти тафоҳум миёни Вазорати корҳои хориҷии Ҷумҳурии Тоҷикистон ва Вазорати корҳои хориҷии Ҷумҳурии Финландия оид ба рушди ҳамкориҳои Тоҷикистон ва Финландия барои солҳои 2014-2017 баргузор гардид.
Бино ба маълумоти департаменти иттилооти ВКХ ҶТ, онро аз ҷониби Ҷумҳурии Тоҷикистон Вазири корҳои хориҷӣ Сироҷидин Аслов ва аз ҷониби Ҷумҳурии Финландия Сафири ин кишвар дар Тоҷикистон Никлас Линдквист ба имзо расониданд.
Ба иттилои манбаъ, санади мазкур самтҳои асосии ҳамкориҳоро миёни Ҷумҳурии Тоҷикистон ва Ҷумҳурии Финландия дар чаҳорчӯбаи барномаи рушди ҳамкорӣ барои солҳои 2014-2017 муайян мекунад.
Зимнан зикр мегардад, ки баъд аз маросими ба имзорасонӣ мулоқоти дуҷониба барпо гардид. Дар вохӯрӣ тарафҳо қаноатмандии худро роҷеъ ба муносибатҳо миёни Тоҷикистон ва Финляндия изҳор намуда, умедвории худро аз рушд ва таҳкими ин муносибатҳо баён намуданд.
