Бар асари ҳодисаҳои садамаи нақлиёт, ки рӯзи 15-уми декабьри соли равон дар қаламрави ҷумҳурӣ рух доданд, 5 нафар ба ҳалокат расиданд.
Бино ба иттилои сомонаи расмии ВКД ҶТ, ронандаи автомашинаи тамғаи «Мерседес-Бенс», Маҳмадалӣ Абдураҳмонови 20-сола, сокини ш.Душанбе, ҳангоми ҳаракат аз тарафи кӯчаи Гипрозем ба самти кӯчаи Фирдавсӣ, дар рӯ ба рӯи тарабхонаи «Халиф»-и пойтахт, аз ӯҳдаи идораи воситаи нақлиёт набаромада, пиёдагард Руслан Салимови 25-сола, сокини ш.Душанберо пахш намудааст. Дар натиҷа пиёдагарди номбурда ҷароҳати вазнини ҷисмонӣ бардошта, дар беморхона ба ҳалокат расидааст.
Ронандаи автомашинаи тамғаи «Чанху», Мамадназир Назриеви 24-сола, сокини ш.Хоруғ, ҳангоми ҳаракат дар шоҳроҳи Душанбе-Хоруғ, дар ҳудуди ноҳияи Рӯшон бехатарии воситаи нақлиётро риоя накарда, пиёдагарди ноболиғ Носир Офаридаеви 10-сола, сокини н.Рӯшонро пахш намудааст. Дар натиҷа ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Ронандаи автомашинаи тамғаи «Опел-Астра», Абдукарим Шарифови 49-сола, сокини н.Муъминобод, ҳангоми ҳаракат дар роҳи мошингарди деҳаи Боггаӣ ва Дендистони ноҳияи Муъминобод, бехатарии воситаи нақлиётро риоя накарда, ба канори чапи роҳ баромада, чаппа шудааст. Дар натиҷа худи ронанда ва мусофири автомашина шаҳрванд Момагул Сафаралиеваи 33-сола, сокини ш.Кулоб ҷароҳатҳои вазнини ҷисмонӣ бардошта, дар беморхона ба ҳалокат расидаанд. Мусофири дигари автомашинаи мазкур шаҳрванд Шаҳло Шарифоваи 24-сола, сокини н.Муъминобод, ҷароҳати ҷисмонӣ бардошта, дар беморхона бистарӣ гардидааст.
Ронандаи автомашинаи тамғаи «ГАЗ-3285-Микроавтобус» Хӯҷаев Нуралии 62-сола, сокини н.Ҳисор, ҳангоми ҳаракат дар роҳи мошингарди самти деҳаи Ҳисор, аз ӯҳдаи идораи воситаи нақлиёт набаромада, пиёдагард Абдукарим Юсупови 48-сола, сокини ҳамин ноҳияро пахш намудааст. Дар натиҷа пиёдгард ҷароҳати вазнини ҷисмонӣ бардошта, дар беморхона ба ҳалокат расидааст.
