Соли 2013 ҳудуди 970 млн. кВт/соат нерӯи барқи дар Тоҷикистон истеҳсолшуда ба маблағи умумии 33,6 млн. доллари ИМА ба хориҷи кишвар содир карда шуд.
Бино ба маълумоти Агентии омори назди президенти Тоҷикистон, аз ин миқдор 99,2% ба Афғонистон ва 0,8% ба кишвари ҳамсояи Қирғизистон интиқол дода шудааст.
Ба иттилои манбаъ, соли гузашта ба Тоҷикистон дар ҳаҷми ҳамагӣ 21 млн. кВт/соат ба маблағи 211 ҳазор доллари ИМА нерӯи барқ ворид шудааст. Воридоти нерӯи барқ ба Тоҷикистон баҳори соли гузашта, давраи ба камбуди шадиди барқ дучор шудани кишвар сурат гирифтааст.
Бино ба маълумоти Вазорати энергетика ва захираҳои оби ҶТ, соли 2013 дар Тоҷикистон беш аз 17 млрд. кВт/соат нерӯи барқ истеҳсол шуда, ҳаҷми воқеъии талафоти он зиёда аз 2,5 млрд. кВсоат (15% аз ҳаҷми умумии истеҳсол)-ро ташкил додааст, ки нисбат ба нишондиҳандаи соли 2012 ба андозаи 0,5% зиёдтар аст. Маблағи умумии фурӯши барқ ба ҳудуди 1,1 млрд. сомонӣ (тақрибан 230 млн. $) баробар шудааст.
