Кормандони Агентии назорати маводи нашъаовари назди Президенти ҶТ ду нафар сокинони ноҳияи Рӯдакиро боздошт намуданд, ки аз онҳо маводи нашъаовар мусодира гардид.
Бино ба иттили шуъбаи робита бо ҷоемаи Агентӣ, кормандони Агентӣ иттилооти оперативӣ дастрас намуданд, ки посбони Коллеҷи техникӣ-омӯзгории ноҳияи Рӯдакӣ, ки дар шаҳраки Сомониён ҷойгир аст, бо муомилоти ғайриқонунии маводи нашъаовар машғул мебошад.
Қарор карда шуд, ки қаровулхонаи коллеҷ, ки посбон он ҷо зиндагӣ ва кор мекард, аз назар гузаронида шавад,. Бо ин мақсад саги хизматӣ-ҷустуҷӯиро бо лақаби “Фиҷи” истифода бурданд.
Дар натиҷаи ҷустуҷӯи бодиққат дар ҷои пинҳонии қаровулхона бастаеро дарёфт намуданд, ки дар дохили он 80 адад порачаҳои қаҳваранг бо бӯи махсус мавҷуд буд ва саги хизматӣ ба ин бӯй мутаассир гардид.
Аз рӯи ин ҳодиса посбони қаровулхона С.И., ки маводи нашъаовари мусодирагардида ба ӯ тааллуқ дошт, инчунин шарики ҷиноят С.Ю., ки ба посбон маводи нашъаоварро фурӯхтааст, боздошт гардиданд.
Чӣ тавре, ки тафтиши пешакӣ нишон дод, С.И. пеш ду маротиба суд шуда будааст: бори аввал соли 1996 дар Ҷумҳурии Қазоқистон ва бори дуюм соли 2006 дар Федератсияи Россия, ҳар ду бор ҳам барои даст доштан ба муомилоти ғайриқонунии маводи нашъаовар.
Аз тарафи Шӯъбаи тафтишоти Агентӣ парвандаи ҷиноӣ аз рӯи аломатҳои ҷиноятҳое, ки бо қ 3 моддаи 200 Кодекси Ҷиноятии Ҷумҳурии Тоҷикистон пешбинӣ шудааст, оғоз гардидааст.
Боздоштшудагон ба Тавқифгоҳи нигоҳдории муваққатии Агентӣ ҷойгир карда шуданд.
