– Қарори суди ноҳияи Фирдавсии пойтахт аз рӯи даъвои ба истилоҳ намояндагони зиёиёни тоҷик нисбати ҳафтаномаи «Азия-Плюс» ва муҳаррири он Олга Тутубалина умеди охирини ман ба мустақилияти мақомоти судии Тоҷикистонро барҳам дод, – иброз дошт ба ОИ «Азия-Плюс» раиси ҲНИТ, вакили палатаи поёнии парлумон Муҳиддин Кабирӣ.
«Аён шуд, ки дар кишвари мо судҳо бо супориш ё таъсири ҳокимияти давлатӣ қарор қабул мекунанд: мазҳакаи судӣ вобастагии мақомоти судиро аз ҳукуматдорон комилан собит кард», – гуфт Кабирӣ.
Раиси ҲНИТ таъкид намуд, ки мурофиаи судии мазкур нишон дод, ки дар кишвари мо зиёӣ ҳамчун қишри ҷомеа умуман вуҷуд надорад. «Шахсиятҳои ҷудогона ҳастанд, аммо қишри зиёиён дар ҷомеа вуҷуд надорад», – чунин мешуморад Кабирӣ.
Ба андешаи ӯ, ин мурофиаи судӣ бори дигар собит сохт, ки «дар Тоҷикистон озодии ВАО танҳо дар гуфтор вуҷуд дошта, дар амал ҳукуматдорон бо ҳама гуна воситахо мушкилоту монеъа эҷод мекунанд».
