Зимни вохӯрии корманди намояндагии Хадамоти муҳоҷирати Вазорати меҳнат, муҳоҷират ва шуғли аҳолии ҶТ дар Русия бо директори генералии ширкати сохтмони «РемСтройКомнуш»-и шаҳри Ревдаи вилояти Свердловски Русия Файзалӣ Шарипов роҳбари ширкат изҳор намудааст, ки онҳо ба қабули беш аз 60 нафар мутахассисон аз ҳисоби муҳоҷирони кории тоҷик омодаанд.
Сухангӯи намояндагӣ Иброҳим Аҳмадов ба ОИ «Азия-Плюс» дар ин робита иттилоъ дод, ки роҳбари ширкати сохтмонии Русия зикр кардааст, ки айни замон дар навбати аввал онҳо ба хиштчинон, андовагарон, насбгарон, кафшергарон, устои барқ ва мутахассисони дигар касбу корҳои сохтмонӣ ниёз доранд.
«Ширкати сохтмонӣ ба муҳоҷирон дар анҷоми расмиёти ҳуҷҷатҳои зарурии иҷозатномавии будубош ва кор мусоидат намуда, ҳамчунин муҳоҷирони кориро бо хобгоҳ ва ғизо таъмин менамояд», – иброз дошт ӯ.
Ба гуфтаи манбаъ, дар остонаи фарорасии мавсими корӣ ба намояндагӣ аз корфармоёни рус дархостҳо мерасанд ва намояндагӣ баҳри ҷалби корфармоёни имконпазир ҷиҳати бо ҷойи корӣ таъмин намудани шаҳрвандони тоҷик дар қаламрави Русия ҳамаҷониба тадбир меандешад.
