Бо назардошти рӯзҳои истироҳат ва идҳо – Рӯзи модарон ва ҷашни Наврӯз, моҳи марти соли ҷорӣ тоҷикистониён 15 рӯз истироҳат мекунанд.
Тавре ба ОИ «Азия-Плюс» як манбаъ аз Федератсияи иттифоқҳои касабаи мустақили Тоҷикистон хабар дод, мутобиқи меъёрҳои қонуни ҷумҳурӣ «Дар бораи рӯзҳои ид», агар иди расмӣ бо рӯзи истироҳат ба рӯзҳои шанбе ва якшанбеи ҳафта рост ояд, рӯзи кории минбаъда низ рӯзи истироҳат эълон мешавад.
«Рӯзи модарон – 8-уми март имсол ба рӯзи шанбеи ҳафта рост меояд, аз ин рӯ, 10-уми март (рӯзи душанбе) низ рӯзи истироҳат эълон мешавад», – гуфт манбаъ
Ба иттилои манбаъ, дар таҷлили ҷашни Наврӯз рӯзҳои 21, 22, 23 ва 24-уми март расман рӯзҳои истироҳат шуморида мешаванд ва чун рӯзҳои 22 ва 23-юми март ба рӯзҳои шанбе ва якшанбеи ҳафта рост меоянд, тоҷикистониён рӯзҳои 25 ва 26-уми март низ истироҳат мекунанд.
Ҳамин тариқ, моҳи март тоҷикистониён 15 рӯз – рӯзҳои 1,2,8,9,10,15,16,21,22,23,24,25,26,29 ва 30-юми март истироҳат хоҳанд кард.
