Реҷаи маҳдуди истифодаи барқ дар Тоҷикистон, ки аввали моҳи октябри соли гузашта ҷорӣ гардида буд, сабуктар карда мешавад, вале алҳол пурра бекор намегардад.
Тавре ба ОИ «Азия-Плюс» аз Вазорати энергетика ва захираҳои оби ҶТ хабар доданд, тибқи қарори қабулшудаи ҳукумат, интиқоли барқ ба минтақаҳое, ки дар онҳо реҷаи маҳдуди барқ ҷорӣ шудааст, рӯзона афзуда мешавад.
«Алҳол реҷаи маҳдуди истифодаи барқро комилан бекор карда наметавонем, вале бо назардошти вазъи обуҳаво амал хоҳем кард. Агар обуҳавои мусоид боқӣ монад, ояндаи наздик бекор кардани лимит аз эҳтимол дур нест. Обуҳавошиносон вазъи мусоиди обуҳаворо пешгӯӣ мекунанд, вале мо таваккал карданӣ нестем, зеро дар сурати акс, нима ё охири моҳ захираҳои об дар обанбори нерӯгоҳи Норак барои истеҳсоли барқ метавонанд ба сатҳи хеле кам аз нуқтаи зарурӣ поин раванд», – гуфтанд дар вазорат.
Дар Вазорат ҳамчунин зикр карданд, ки дар минтақаҳои реҷаи махуди истифодаи барқ ҷоришуда тадриҷан реҷаи интиқоли рӯзонаи барқ бо қатъи интиқоли шабонаи он ҷорӣ карда мешавад. Алҳол энергетикҳо ниҳоӣ будани тасмими худро тасдиқ намекунанд ва изҳор мекунанд, ки ҳамааш ба сатҳи маҷрои дарёи Вахш вобаста хоҳад буд.
