– Ба ҳеҷ ваҷҳ ба рӯйдодҳо дар шаҳри Пушкинои вилояти Маскав ангезаи сиёсӣ додану сухан гуфтан бобати дар натиҷаи адовати миллӣ кушта шудани мухлиси футбол лозим нест, – гуфт ба «Азия-Плюс» намояндаи расмии сафорати Тоҷикистон дар Русия Муҳаммад Эгамзод.
«Ин як муноқишаи оддӣ миёни ду ҷавон аст, ки ба марге яке аз онҳо анҷомид», – мегӯяд ӯ. – Гузашта аз ин, шахси ин ҷиноятро содиркарда боздошт ва дар сурати аз ҷониби суд исбот шудани гуноҳ, ӯ муҷозот мешавад. Паҳлӯи дигари масъала он аст, ки ӯ шаҳрванди Ӯзбекистон аст ва акнун дар ВАО оид ба муҳоҷирон маълумоти манфӣ паҳн карда мешавад, ки вазъ дар ҷомеаро каме ноором месозад».
Ба қавли ӯ, аз вазъи мушкил дар шаҳри Пушкино дар сафоратхона огоҳанд. «Мо мунтазам бо шаҳрвандонамон, бахусус бригадирони онҳо дар майдони сохтмон дар тамосем. Ҳамчунин огаҳем, ки бозоре, ки дар он бештар зодагони Қафқозу Осиёи Марказӣ фаъолият доштанд, баста аст. Кормандони масъули Хадамоти консулгарӣ ҳар гоҳ бо мақомоти пулиси шаҳри Пушкино дар тамос мешаванд, то ки аз вазъи муҳоҷирон дар ин шаҳр огоҳ гарданд. Сардори басти пулиси шаҳр майор П.П. Школа хабар дод, ки маълумот дар бораи гӯё шикори муҳоҷирони корӣ ва кушта шудани муҳоҷирони тоҷик асоси воқеӣ надорад», – изҳор дошт Эгамзод.
Номбурда таъкид дошт, ки сафоратхона рӯйдодҳо атрофи ин қазияро пайгирӣ дошта, доимо бо мақомоти интизомӣ дар робита аст.
«Ба ҳар ҳол, боисрор аз ҳамдиёрони муқими ин минтақа хоҳиш мекунем, ки бидуни зарурати таъҷилие аз кӯча баромадан худдорӣ кунанд. Дар сурати лозим шудани кумаки мо, метавонанд ба телефонҳои зерин занг зананд: 8(495) 690-4186, 690-61-02 ва 690-38-46. Навбатдорони сафоратхона муддати тамоми шабонарӯз кор мекунанд», – афзуд Эгамзод.
Рӯзи ҷумъаи ҳамин ҳафта раиси Иттифоқи ҷавонони Тоҷикистон дар Русия Иззат Амон дар бораи
ҳамлаҳо ба муҳоҷирони кории тоҷик
дар шаҳри Пушкино хабар дода буд.
