Президенти Тоҷикистон Эмомалӣ Раҳмон дар робита ба содир шудани амали террористӣ дар шаҳри Урумчӣ ба раиси Ҷумҳурии Мардумии Чин Си Ҷинпин барқияи тасаллият ирсол намуд.
Тавре хадамоти матбуоти сарвари давлат хабар медиҳад, дар барқияи Эмомалӣ Раҳмон зикр мегардад, ки хабари содир шудани амали террористӣ дар яке аз бозорҳои Урумчиро, ки боиси ҳалокати даҳҳо нафар афроди бегуноҳу осеб дидани мардуми сершумор шуд, мардуми Тоҷикистон бо андӯҳи беандоза қабул карда, онро маҳкум менамоянд.
«Ин амали даҳшатнок бори дигар зарурати таъҷилии муттаҳидсозии кӯшишҳои ҷомеаи ҷаҳонӣ барои муқовимати пурсамар бо терроризми байнулмилалӣ ва аз байн бурдани шароитҳои мусоидаткунанда барои пайдоиш ва паҳншавии онро собит месозад», – гуфта мешавад дар барқияи сарвари давлати Тоҷикистон.
Дар барқия Эмомалӣ Раҳмон аз номи мардуми тоҷик ба ҳамаи наздикони ҳалокшудагон изҳори ҳамдардӣ намуда, ба осебдидагон шифои ҳарчи зудтар хостааст.
Ёдрас мекунем, ки субҳи рӯзи 22-юми май афроди номаълум дар ду автомашина ба бозори назди боғи Жэнмини шаҳри Урумчӣ ворид гардида, ба издиҳоми одамон маводи тарканда партофтанд, ки дастикам 31 нафар кушта ва 90 нафар ҷароҳат бардоштанд.
