Идораи нашрияи «Азия-Плюс» ва муҳаррири он Олга Тутубалина ба Суди олии Тоҷикистон шикояти назоратӣ бурданд.
Ба гуфтаи адвокати газета Иноят Иноятов, аз суди назоратӣ даъвогарон талаб доранд, ки ҳалномаи суди ноҳияи Фирдавсӣ ва қарори коллегияи судии шаҳри Душанбе бекор карда шавад. Моҳҳои оянда баррасии шикоят шурӯъ мешавад. «Мо умедворем, ки дар Суди олии Тоҷикистон парвандаи шаҳрвандии мазкур воқеъбинона ва мунсифона баррасӣ мешавад», – иброз дошт ӯ.
Ёдрас мекунем, ки дар робита ба нашри мавод дар ҳафтавори «Азия-Плюс» «Ғайризиёиёна дар бораи зиёиён»
(Неинтелегентно об интеллигенции)
аз ҷониби муҳаррир, даъвогарон – Академияи илмҳо, Иттиҳоди нависандагон, Иттиҳоди рассомон, Иттиҳоди меъморон ва се шахси воқеӣ – Д.Абдиева, А.Раҷабов ва Х. Раҳматов аз суд дархост карданд, ки газетаи «Азия-Плюс» ва муаллифи матлаб Олга Тутубалинаро ба инкори маълумоти пастзанадаи шаъну эътибор, маъзарат хостан барои нашри матлаб, таъини ташхиси судии лингвистӣ, рӯёнидани ҷубронпулӣ дар ҳаҷми 200 ҳазор сомонӣ аз газета ва муаллифи матлаб барои зарари маънавӣ ва ҳабси амволи манқул ва ғайриманқули Олга Тутубалина уҳдадор созад.
Суди ноҳияи Фирдавсии пойтахт рӯзи 25-уми феврал оид ба парвандаи «зиёиён алайҳи «Азия-Плюс»
қарор содир намуда
, идораи ҳафтанома ва муҳаррири он Олга Тутубалинаро натанҳо ба нашри раддия, балки ҳамчунин ба пардохти 30 ҳазор сомонӣ ба се шахси воқеӣ – даъвогарон (Д.Абдиева, А.Раҷабов ва Х.Раҳматов) низ уҳдадор кард.
Санаи 18-уми март адвокатҳои газета ва муҳаррири он аз болои қарор шикоят бурда, зикр карданд, ки ҳалномаи мазкур «беасос» ва «ғайриқонунӣ» аст. Онҳо зикр карданд, ки Тутубалина барои суханони Ленин аз нигоҳи ҳуқуқӣ масъул буда наметавонад. Аммо коллегияи судии суди шаҳр, ки рӯзиз 30-юми апрел баргузор шуд, шикояти кассатсионии нашрияи «Азия-Плюс» ва муҳаррири он Олга Тутубалинаро
қонеъ накарда,
қарори суди ноҳияи Фирдавсии пойтахт аз рӯи парвандаи «Зиёиён алайҳи Азия-Плюс»-ро бетағйир боқӣ гузошт.
