Маблағи умумии лоиҳаҳои Бонки ҷаҳонӣ (БҶ) ва Бонки осиёгии рушд (БОР), ки дар Тоҷикистон амалӣ мешаванд, дар маҷмӯъ 1,9 млрд. доллари ИМА-ро ташкил медиҳанд.
Бино ба иттилои сомонаи расмии Кумитаи давлатии сармоягузорӣ ва идораи амволи давлатии Тоҷикистон, зимни нӯҳумин Шарҳи Муштараки маҷмӯии лоиҳаҳои сармоягузории давлатии Ҳукумати Ҷумҳурии Тоҷикистон, БОР ва БҶ дар Кохи Ваҳдати пойтахт зикр гардид, ки 1,2 млрд. $ ё 61 фоизи он ба БОР ва 743 млн. доллари ИМА ё 39 фоизи он ба Бонки умумиҷаҳонӣ рост меояд.
«Аз соли 1998 то ба имрӯз аз ҷониби бонкҳои мазкур дар маҷмӯъ маблағгузории қариб 110 лоиҳа дастгирӣ ёфта, татбиқи қисми зиёди онҳо таъмин гардидааст. Ба ҳолати 1 июни соли 2014 бошад, маҷмӯи лоиҳаҳои амалкунандаи БОР аз 11 лоиҳаи қарзию грантӣ ба маблағи 570,97 млн. доллари америкоӣ ва БҶ аз 13 лоиҳаи қарзию грантӣ ба маблағи 213,84 млн. доллари ИМА иборат аст ва бояд қайд намуд, ки 83,3%-и маблағҳои БОР-ро маблағҳои грантӣ ташкил дода, аз БҶ бошад, 88,5% маблағҳои грантӣ мебошанд», – қайд мешавад дар маълумоти Кумитаи мазкур.
Гуфта мешавад, ҳадафи асосии гузаронидани чунин шарҳ аз он иборат аст, ки таҳлили раванди татбиқи лоиҳаҳои сармоягузории бонкҳои мазкур, проблемаю мушкилотҳое, ки дар татбиқи лоиҳаҳои сармоягузорӣ ҷой доранд, бартараф карда шаванд.
Зимнан зикр мегардад, ки дар сохтори Маҷмӯи лоиҳаҳои амалкунандаи бонкҳои мазкур маблағҳои ҷудогардида барои рушди соҳаҳои энергетика, нақлиёт, кишоварзӣ, обтаъминкунӣ, маориф, тандурустӣ ва идоракунии давлатӣ сафарбар карда шудаанд.
