Дар ҷаласаи Мушовараи ВКД Ҷумҳурии Тоҷикистон таҳти раёсати вазири корҳои дохилӣ генерал-лейтенанти милитсия Раҳимзода Рамазон Ҳамро «Натиҷаҳои фаъолияти оперативӣ-хизматии мақомоти корҳои дохилӣ ва Қӯшунҳои дохилӣ дар нимсолаи аввали соли 2014 ва вазифаҳо барои нимсолаи дуюм» баррасӣ шуд.
Бино ба иттилои маркази матбуоти ВКД ҶТ, дар ҷаласа таъкид гардид, ки сарфи назар аз тадбирҳои андешида, қонуншиканиҳо аз ҷониби наврасону ҷавон тамомили афзоиш дорад ва дар нимсолаи аввали соли равон содиршавии ҷиноят аз тарафи ноболиғон ва бо иштироки онҳо нисбат ба ҳамин давраи соли гузашта 2,4 % ё 11 ҳолат зиёд гардидааст.
Дар ҷаласа ба масъалаи бехатарии сӯхтор низ таваҷҷуҳи хосса зоҳир гардида, қайд карда шуд, ки дар давоми 6 моҳи соли равон шумораи сӯхторҳо 28 ҳолат зиёд гардида, бар асари он 21 нафар фавтидаанд, ки 10 нафари онро ноболиғон ташкил медиҳанд.
Ҳамчунин дар робита ба таъмини бехтарии ҳаракат дар роҳ зикр гардид, ки дар самти таъмини бехатарии ҳаракати нақлиёт дар роҳҳои автомобилгарди ҷумҳурӣ, мунтазам рейдҳо ва амалиётҳои махсус гузаронида мешавад, вале новобаста аз чораҳои андешидашуда дар ин самт, вазъи садаманокӣ 32 ҳолат зиёд ба қайд гирифта шудааст.
