Сафоратхонаи Тоҷикистон дар Русия ба корҳои омодагӣ ба баргузории Конфронси III-уми ҳамкории байниминтақавии Русияву Тоҷикистон ва Форуми IV-уми байнипарлумонии «Русия – Тоҷикистон: имконоти ҳамкории байниминтақавӣ» суръат мебахшад.
Намояндаи расмии сафоратхонаи Тоҷикистон дар Русия Муҳаммад Эгамзод ба «Азия-Плюс» дар ин робита иттилоъ дод, ки чорабиниҳои мазкур моҳи октябри соли равон дар шаҳри Маскав баргузор мешаванд.
«Дар ин робита рӯзи 10-уми июл вохӯрии сафир Имомуддин Сатторов бо муовини раиси Шӯрои Федератсия Вячеслав Штиров ва котиби муовини вазири рушди минтақавии Русия Светлана Иванова ва ҳамчунин роҳбарони воҳидҳои сохтории дастгоҳи Шӯрои Фкдератсия доир гардида, ҷонибҳои масоили тадорукотии омодагӣ ба ин чорабинии муҳими муштаракро баррасӣ карданд», – гуфт Эгамзод.
Ӯ зикр кард, ки дар ҷараёни вохӯрӣ Штиров сафири тоҷикро бо барномаи пешакии баргузор намудани чорабинӣ, ки таҳти сарпарастии палатаҳои болоии ҳарду кишвар доир мегардад, шинос кард.
«Яке аз ҳадафҳои баргузории ин форум тақвият бахшидани ҳамкориҳои дуҷониба дар сатҳи минтақаҳо аст ва айни замон беш аз 60 субъекти Русия дар шаклҳои гуногун бо минтақаҳои Тоҷикистон робитаҳои ҳамкорӣ доранд», – таъкид дошт В.Штиров.
Дар навбати худ, Имомудиин Сатторов аз боз ҳам бештар фаъол гардонидани муносибатҳои дуҷонибаи Тоҷикистону Русия истиқбол намуда, таъкид дошт, ки раҳбарият ва доираҳои тиҷоратии Тоҷикистон ба тавсеъаи ҳамкориҳо бо минтақаҳои Русия таваҷҷуҳи хосса зоҳир мекунанд. «Сатторов ҳамчунин оид ба як қатор самтҳои ҳамкории мавриди таваҷҷуҳи ҷониби Тоҷикистон, аз ҷумла бахши сайёҳӣ, энергетика, иктишофи геологӣ ва ғайра маълумот дод», – иброз дошт Эгамзод.
Зимнан зикр гардид, ки намояндагони минтақаҳои Тоҷикистону Русия моҳи октябр дар шаҳри Маскав гирдиҳам меоянд. Баргузории чорабиниҳо дар Донишгоҳи давлатии Маскав дар назар аст.
