Раиси Ҳизби сотсиал-демократии Тоҷикистон Раҳматилло Зойиров, ки ба сифати адвокат аз манфиатҳои ҳамто ва муовини худ дар ҳизб Шуҳрат Қудратов ҳимоя мекунад, дар робита ба боздошти ӯ изҳор намуд, ки Шуҳрат Қудратов эътироф намудааст, ки аз зерҳимояи худ маблағи пулӣ гирифтааст, вале на барои порадиҳӣ ба судя.
«Воқеъан ҳам адвокат Шуҳрат Қудратов аз зерҳимояи худ Амиралӣ Сумалаев пул гирифтааст, вале на барои порадиҳӣ ба судя, то ки зерҳимояашро бегуноҳ эътироф намояд, балки ба ҷониби дуюм – ҷабрдида додани ин маблағ барои ҷуброни зиёни расида ба ӯ аз Сумалаевҳо», – иброз дошт Зойиров.
Ба гуфтаи ӯ, Шуҳрат Қудратов ин матлабро зимни маросими рӯбарӯкунӣ бо дӯсти А.Сумалаев ки ҳангоми додани пул иштирок доштааст ва ҳам қаблан дар ҷараёни маросими рӯбарӯкунӣ бо худи Сумалаев изҳор доштааст.
Ба савол дар бораи аз ҷониби худи Сумалаев ва дӯсти ӯ айбдор донистани Қудратов дар гирифтани маблағи пулӣ барои порадиҳӣ ба судя, Зойиров танҳо ҳаминро зикр кард, ки айни замон гуфтаҳои онҳо мухолифатомезанд. «То охири тафтиш ман дар бораи маҳз чиҳо гуфтани онҳо чизе гуфта наметавонам, вале қайд карданиам, ки нишондодҳои онҳо мухолифи якдигаранд», – афзуд Зойиров.
Ба қавли номбурда, рӯзи 24-уми июл ӯ ҳамчунин бо зерҳимояи худ вохӯрда, Қудратов ба ӯ маҳз чӣ гуна сурат гирифтани ҳодисаро шарҳ додааст.
Ёдрас мекунем, ки Агентии назорати давлатии молиявӣ ва мубориза бо коррупсияи ҷумҳурӣ дар робита ба сабабҳои боздошти адвокат Шуҳрат Қудратов рӯзи 23-юми июл
маълумоти расмӣ
интишор намуд.
Сипас Шӯрои сиёсии Ҳизби сотсиал-демократии Тоҷикистон қарор кард, ки раиси ҳизб, ҳуқуқшинос Раҳматилло Зойиров муовини худ Шуҳрат Қудратовро
шахсан ҳимоят мекунад
.
Баъдан ташкилотҳои ҷамъиятии Тоҷикистон, намояндагони иттиҳодияҳои адвокатӣ, ҳамчунин аъзои Эътилофи созмонҳои ҷамъиятии зидди шиканҷа дар Тоҷикистон дар робита ба боздошти адвокат Шуҳрат Қудратов
изҳорот пахш намуда,
аз ҳукуматдорони Тоҷикистон даъват карданд, ки парвандахои Ш.Қудратов ва Ф.Зокиров мунсифонаву беғараз баррасӣ карда шаванд.
