Конибодом. 18-уми июл. ОИ «Азия-Плюс» – Соли равон дар шаҳри Конибодоми вилояти Суғд 17 иншооти нави таъиноти иҷтимоиву фарҳангӣ ва маишӣ мавриди истифода қарор гирифт.
Сардори шӯъбаи шаҳрии сохтмони асосӣ Асрор Шарипов ба ОИ «Азия-Плюс» изҳор дошт, ки дар шаҳр заводи истеҳсоли хишт, мактаби кӯдаконаи санъат ва дар нуқтаи гардишгоҳи роҳи мошингарди Конибодом-Исфара-Хуҷанд чойхона ба истифода дода шудааст.
«Аз ҳисоби ҳамаи манбаъҳои молиягузорӣ ба маблағи 1,7 млн. сомонӣ фондҳои асосӣ азхуд карда шудаанд, ки он нисбат ба ҳамин давраи соли гузашта 113 фоизро ташкил медиҳад, – гуфт ӯ. -Дар ҳаҷми 5 ҳазору 665 метри мураббаъ манзили зист бунёд гардид ва аз маблағи 3,3 млн. сомонии азхудкардаи сохтмончиён (187 фоиз нисбат ба ҳамин давраи соли гузашта) 1,3 млн. сомонӣ ба аҳолӣ ва 463 сомонӣ ба соҳибкорони маҳаллӣ рост меояд.
А.Шарипов мегӯяд, ки дар шаш моҳи соли ҷорӣ тавассути ҳашар сокинон 6 синфхонаи таълимӣ бунёд кардаанд ва имрӯзҳо сохтмони боз 9 адад чунин синфхонаҳо идома дорад.
