Нимаи аввали имрӯз дар шаҳри Душанбе вохӯрии сеҷонибаи сарони кишварҳои Тоҷикистону Эрон ва Афғонистон доир мегардад.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, Эмомалӣ Раҳмон, Ҳасани Рӯҳонӣ ва Ҳомид Карзай масъалаҳои вазъи кунунӣ ва дурнамои ҳамкориҳо миёни се кишвари форсизабон дар бахшҳои иқтисоду нақлиёт, амният, энергетика ва тиҷоратро баррасӣ хоҳанд кард.
Барои иштирок дар кори нишасти СҲШ президенти Афғонистон Ҳомид Карзай ин дақиқаҳо бояд ба Тоҷикистон ворид шавад. Президенти Эрон Ҳасани Рӯҳонӣ рӯзи 10-уми сентябр бо сафари расмӣ ба Тоҷикистон ташриф овард.
Бино ба иттилои ВАО-и Афғонистон, аввали ҳафтаи оянда Ҳомид Карзай ваколатҳои худро ба президенти тозаинтихоб месупорад ва сафари кунунии ӯ ба Тоҷикистон яқинан сафари охирини ӯ ба кишвари хориҷӣ ба сифати сарвари давлати Афғонистон маҳсуб меёбад.
