Рӯзи 9-уми октябр дар яке аз толорҳои маъруфи шаҳри Лондон – Кадоган Холл ба муносибати 450-солагии классики ҷаҳонӣ Уилям Шекспир консерт барпо шуд.
Тавре аз сафорати Тоҷикистон дар Лондон хабар доданд, барномаи консерт аз асарҳои оҳангсозони машҳур Петр Чайковский – «Увертюра-фантазия Ромео ва Ҷулетта», Сергей Прокофев – «Ромео ва Джульетта», Юрий Тер Осипов – «Консерт барои скрипка ва оркестр», Арам Хачатурян – «Валси маскарад» иборат буд.
Дар барномаи консертии мазкур асарҳои мусиқии оҳангсози боистеъдоди тоҷик Толиб Шаҳидӣ, аз қабили романсҳои оркестр ва овозҳои сонетаи Шекспир «Devouring Time», порчаҳо аз балети «Рубоиҳои Хайём» ва ҳамчунин мусиқӣ аз операи «Комде ва Мадан», ки ба қалами оҳангсози тоҷик Зиёдулло Шаҳидӣ тааллуқ дорад, мақоми хоссаро касб намуданд.
Консерт бо дастгирии сафортаи Тоҷикистон дар Лондон доир гардида, миёни ҳаводорони мусиқии класссикӣ сафирони давлатҳои хориҷӣ, кормандони сафоратхонаҳо, намояндагони Вазорати корҳои хориҷии Британияи Кабир ва созмонҳои байнулмилалӣ ҳузур доштанд.
«Сафири Кувайт дар Лондон ҷаноби Холид ал-Дувайсан таваҷҷуҳи шахсиашро ба фарҳанг ва эҷодиёти мардуми Тоҷикистон махсус таъкид намуд. Ба гуфтаи сафир, ӯ боре аз Тоҷикистон боздид намуда, имкон доштааст, ки шахсан бо фарҳанги ғаниву таърихи куҳани тоҷикон аз наздик ошно гардад ва ба барномаи консертии мазкур ворид шудани асарҳои Зиёдулло ва Толиб Шаҳидӣ аз намунаи барҷастаи дастовардҳои намояндагони ҳунари мусиқии Тоҷикистон гувоҳӣ медиҳад», – қайд мекунад сафорати ҶТ дар Лондон.
