Анҷумани санаи 16-уми декабр пешбинишудаи Ҳизби наҳзати исломии Тоҷикистон дар дафтари кории ҳизб дар пойтахт доир мегардад.
Муовини раиси ҲНИТ, роҳбари ситоди пешазинтихоботии ҳизб Маҳмадалии Ҳайит ба «Азия-Плюс» дар ин робита иттилоъ дод, ки то ҳанӯз мақомоти шаҳрдории Душанбе ба дархости хаттии раиси ҲНИТ, вакили палатаи поёнии парлумони ҷумҳурӣ Муҳиддин Кабирӣ ҷиҳати мусоидат ба ҷудо кардани толор барои баргузории анҷумани пешазинтихоботии ҳизб посух надодааст.
«Мутобиқи моддаи 15-и қонуни Тоҷикистон «Дар бораи ҳизбҳои сиёсӣ», мо барои ҷудо кардани толори муносиб барои баргузор намудани анҷумани пешазинтихоботӣ, ки дар кори он беш аз 500 нафар вакилони аллакай интихобшуда ва ҳудуди 200 нафар меҳмонон ва намояндагони ВАО иштирок мекунанд, мусоидат дархост намудем», – гуфт номбурда.
Зимнан зикр гардид, ки дар анҷуман рӯйхати ҳизбии ҲНИТ иборат аз 20 нафар номзадҳо ба вакилӣ дар палатаи поёнии парлумон эълон хоҳад шуд.
