Нахуствазири Тоҷикистон Қоҳир Расулзода дар кори ҷаласаи навбатии нахуствазирони кишварҳои узви Созмони ҳамкори Шанхай, ки рӯзҳои 14-15-уми декабр дар шаҳри Остона баргузор мешавад, иштирок мекунад.
Бино ба иттилои як манбаъ аз ҳукумати ҷумҳурӣ, дар ҷаласаи мазкур дурнамои таҳкими ҳамкориҳои иқтисодӣ ва гуманитарӣ миёни кишварҳои узви СҲШ баррасӣ шуда, ҳамчунин тадбирҳои аввалиндараҷа оид ба густариши бештари ҳамкориҳои мутақобила бо назардошти тағйирот дар иқтисоди глобалии минтақа мувофиқа мешаванд.
Аз рӯйи натиҷаҳои ҷаласа баёнияи муштарак ва қарорҳо дар бораи ҷанбаҳои гуногуни фаъолияти СҲШ, аз ҷумла оид ба тасдиқи буҷет барои соли 2015 ва ворид намудани тағйирот ба Қоидаҳои молиявӣ қабул мешаванд. Ҳамчунин имзои санадҳо дар бораи густариши ҳамкорӣ миёни хадамотҳои гумруки созмон омода мешавад.
Зимнан зикр гардид, ки дар ҳошияи кори ҷаласа дидору гуфтушунидҳои Қоҳир Расулзода бо роҳбарони ҳайатҳои ҳузурдошта дар ин ҷаласа дар назар аст.
