Намояндагии Хадамоти муҳоҷирати Вазрати меҳнат, муҳоҷират ва шуғли аҳолии Тоҷикистон дар Русия ба дастрас шудани музди меҳнати муҳоҷири корӣ, зодаи ноҳияи Шӯрообод Хайриддин Қурбонов дар ҳаҷми 180 ҳазор рубл мусоидат намуд.
Сухангӯи намояндагӣ Иброҳим Аҳмадов ба «Азия-Плюс» дар ин робита иттилоъ дод, ки муҳоҷири кории номбурда бо ариза ба намояндагӣ муроҷиат карда, изҳор доштааст, ки аз моҳи сентябри соли 2014 то моҳи январи соли равон дар яке аз ширкатҳои сохтмонии шаҳри Маскав кор карда, бо сабабҳои номаълум ширкат қисмате аз музди меҳнаташро пардохт накардааст.
«Пас аз гуфтушуниди корманди намояндагӣ бо раҳбарияти ин ширкати сохтмонӣ масъалаи мазкур роҳи ҳалли худро пайдо намуда, ба муҳоҷири корӣ музди меҳнаташ пурра пардохта шуд», – гуфт сухангӯи намояндагӣ.
Ба гуфтаи ӯ, ҳамчунин муҳоҷири корӣ, зодаи шаҳри Конибодом Шералӣ Деҳқонов, ки дар ҶДММ «Веста» кор мекардааст, пас аз муроҷиат ба намояндагӣ дар ҳаҷми 200 ҳазор рубл қарзи музди меҳнаташро дастрас намуд.
Қобили зикр аст, ки давоми соли 2014 намояндагии Вазорати меҳнат, муҳоҷират ва шуғли аҳолии Тоҷикистон дар Русия ба муҳоҷирони кории тоҷик дар дастрас намудани
беш аз 24 млн. рубли русӣ
музди меҳнаташон мусоидат кард.
