Ба қабули вазири корҳои дохилӣ шаҳрвандони зиёди вилояти Суғд, аз он ҷумла, аз ноҳияҳои дурдаст, монанди Айниву Панҷакент ва Кӯҳистони Мастчоҳу Шаҳристон ташриф овардаанд.
Бино ба иттилои маркази матбуоти ВКД ҶТ, муроҷиатҳои шаҳрвандон гуногун буда, баъзе падару модарони шаҳрвандоне, ки фарзандони онҳо барои шомил шудан ба ҳизбу ҳаракатҳои ғайриқонунӣ, аз қабили «Ансоруллоҳ», «Ҷундуллоҳ» ва ғайра дар маҳбас қарор доранд, аз вазири корҳои дохилӣ хоҳиш намуданд, ки фарзандони онҳо аз маҳбас озод карда шаванд.
Гуфта мешавад, онҳо ба вазир итминон додаанд, ки фарзандонашон аз кардаи худ пушаймон буда, гумроҳ шуда ба ин равияҳо аъзо гардидаанд ва бархе аз онҳо 4-5 фарзанд дошта, мехоҳанд ба назди оилаҳои худ баргарданд ва ба зиндагии осоишта машғул шаванд.
Зимнан зикр мегардад, ки сокинони ноҳияи Мастчоҳ аз ҳамкории зич миёни мақомоти корҳои дохилӣ бо аҳолӣ изҳори қаноатмандӣ намуда, шукри тинҷию ободии кишварро карданд ва доир ба шахсони шубҳанок, ки аъзои равияҳои ғайриқонунӣ мебошанд, ба вазири корҳои дохилӣ маълумот доданд.
