Суди олии Тоҷикистон роҳбарони ширкатҳои «Зулола» ва «Анӯшервон»-ро, ки ба дуздӣ аз фонди президенти Тоҷикистон гумонбар дониста мешуданд, ба 10 соли зиндон маҳкум кард.
Аз Суди олии Тоҷикистон ба «Азия-Плюс» дар ин робита иттилоъ доданд, ки роҳбарони ширкатҳои «Зулола» ва «Анӯшервон» Фирдавс Одинаев ва Баҳодур Шарифов мутобиқи моддаҳои 245 (Азонихудкунӣ ё исрофкорӣ) ва 294 (Фиреби истеъмолкунандагон)- КҶ ҶТ гунаҳкор эътироф гардидаанд.
Дар ҷараёни санҷиши махсуси намояндагони Вазорати маориф, мақомоти прокуратура ва Агентии зиддифасод дар фаъолияти ин ширкатҳо қонуншиканиҳо ошкор гардида, аз рӯйи ин далелҳо дар прокуратураи вилояти Суғд парвандаи ҷиноӣ боз шудааст.
Зимни мурофиаи судӣ намояндаи шуъбаи маорифи ноҳияи Истаравшан изҳор намуд, ки мувофиқи барномаи компютерикунонии мактабҳо лоиҳаи қарори ҳукумат «Дар бораи рушди инноватсионии ҶТ дар солҳои 2011-2010» пешниҳод гардида, маблағгузории он аз ҷониби фонди президенти мамлакат таъмин мешавад.
Ширкатҳои «Зулола» ва «Анӯшервон» дар тендер ғолиб омада, ба мактабҳои шаҳру навоҳии вилояти Суғд 100 адад компютер меоранд, лекин зимни қабули он аз ҷониби раҳбарияти мактабҳо, ошкор мегардад, ки қуттиҳои протсессорҳо холӣ будаанд.
