Се нафар мансабдорони воломақоми Вазорати шаҳрсозии Афғонистон ҳангоми кӯшиши фирор ба Тоҷикистон боздошт шуданд.
Хабаргузории афғонии «Хома» бо такя ба гуфтаҳои Аҳмад Навид Фурӯтан, сухангӯи маъмурияти вилояти Бадахшон, дар шарҳи ин матлаб менависад, субҳи рӯзи 8 июн Муҳаммад Амин Қонеъ, Аҳмад Навоз Бахтиёр ва Саид Амон Содот дар вулусволии Шуғнон боздошт шудаанд, ки кӯшиши ба Тоҷикистон гурехтанро доштаанд.
«Ду ҳафта қабл президенти Афғонистон Ашраф Ғанӣ Аҳмадзай 6 нафар кормандони ин вазоратро ба иттиҳоми ришваситонӣ аз мансабашон сабукдӯш кард. Тафтиши ин парванда ба дӯши Прокуратураи генералӣ вогузор шуда, ба мансабдорони ин ниҳод сафар ба хориҷи кишвар манъ шуда буд, то ки аз ҷавобгарӣ пинҳон шуда натавонанд», – менависад хабаргузории «Хома».
Қаблан иттилоъ дода шуда буд, ки яке аз ин гумонбаршудагон марз бо Покистонро убур карда, ғайр аз ин, қисмате аз мабалғҳои барои кори вазорат ҷудошуда, ба хориҷи кишвар гузаронида шудаанд.
Сухангӯи президент Ҳамдулло Муҳиб дар ин робита таъкид доштааст, ки мубориза бо фасод яке аз самтҳои афзалиятноки кори сарвари давлат ба шумор меравад.
