Президенти Тоҷикистон Эмомалӣ Раҳмон ба палатаи поёнии парлумон муқаррар кардани рутбаҳои нави дипломатӣ дар Тоҷикистонро пешниҳод кард.
Тавре як манбаъ аз ҳукумати ҷумҳурӣ ба «Азия-Плюс» дар ин робита иттилоъ дод, президент пешниҳод кардааст, ки қарори амалкунандаи парлумон дар бораи рутбаҳои дипломатӣ навсозӣ шавад. Аз ҷумла, сарвари давлат пешниҳод намудааст, ки ба кормандони Вазорати корҳои хориҷии кишвар, намояндагони дипломатӣ дар хориҷи давлат, кормандони сохторҳои дахлдори Дастгоҳи иҷроияи президент дараҷаҳои зерини дипломатӣ муқаррар карда шавад – Сафири Мухтор ва Фавқулода, Фиристодаи Мухтор ва Фавқулодаи дараҷаи 1 ва 2, Мушовири дараҷаи 1 ва 2, котиби дараҷаи 1 ва 2 ва ғайра.
Ба гуфтаи манбаъ, тибқи лоиҳаи рӯйхати рутбаҳои дипломатии аз ҷониби президент пешниҳодшуда феҳристи амалкунанда ба таври қобили мулоҳиза навсозӣ хоҳад шуд.
«Пешниҳоди президентро вакилон дар ҷаласаи навбатии иҷлосияи якуми Маҷлиси намояндагони Маҷлиси Олии ҶТ даъвати панҷум, ки рӯзи чоршанбеи ҳамин ҳафта, 10 июн баргузор мешавад, баррасӣ мекунанд», – афзуд сарчашмаи хабар.
