Раиси Ҳизби сотсиал-демократии Тоҷикистон РаҳматиллоЗойиров дар ҷаласаи интернатсионали сотсиалистӣ дар ИДМ, Қафқоз ва кишварҳои соҳили Баҳри Сиёҳ, ки рӯзҳои 8-9 июн дар пойтахти Арманистон – шаҳри Ереван доир гардид, иштирок ва маърӯза кард.
Зойиров дар саҳифаи фейсбукиаш дар ин робита менависад, дар ин чорабинӣ намояндагони 20 кишвар, аз ҷумла Русия, Украина, Озарбойҷон, Арманистон, Беларус, Маҷористон (Венгрия), Қазоқистон, Молдова ва Тоҷикистон ҳузур доштаанд.
Гуфта мешавад, иштирокдорони ҷаласа дар бораи вазъи кишварҳои худ маълумот дода, раиси ҲСДТ низ оид ба вазъ дар Тоҷикистон маърӯза кардааст.
Дар маърӯзаи худ Раҳматилло Зойиров ҳамчунин перомуни масоили интихобот ва тадбирҳои муқовимат бо фасод, вазъи кунунӣ ва вазифаҳои минбаъдаи ҳаракати сотсиал-демократӣ дар замони муосир изҳори назар намудааст.
Зимнан зикр мегардад, ки аз рӯйи натиҷаҳои кори ҷаласа ёддошт ва қатънома қабул шудааст.
