Шоми рӯзи 6 августи тариқи воситаҳои техникии Маркази худкори идоракунӣ дар соҳаи нақлиёти «Шаҳри бехатар» дар маросими баргузории тӯйи арӯсиву домодии сокинони пойтахт 21 адад автомашинаҳои гаронбаҳои хориҷӣ сабт шудааст.
Бино ба маълумоти сомонаи расмии ВКД Тоҷикистон, ин миқдор автомашинаҳо зимни ҳаракат аз хиёбони Исмоили Сомонӣ ба самти хиёбони Сино сабт шуда, онҳо дар маросими тӯйи шаҳрванд Азизов Баҳром Абубакрович, истиқоматкунандаи ш.Душанбе, кӯчаи Рӯдакӣ – бародари ҳофизи эстрадаи тоҷик Шаҳроми Абӯбакр истифода шудаанд.
Дар идома ВКД Тоҷикистон рақамҳои давлатии ҳамаи автомашинаҳои ин маросимро дарҷ намудааст. Миёни автомашинаҳо тамғаҳои «Гелендваген», «Тойота-Лендкрузер», «Мерседес ML», «Порше» ва ғайра ба мушоҳида мерасанд.
ВКД Тоҷикистон хотиррасон мекунад, ки мутобиқи меъёрҳои қонуни Тоҷикистон «Дар бораи танзими анъана ва ҷашну маросимҳои миллӣ дар Ҷумҳурии Тоҷикистон», дар қатораҳои автомашинаҳои маросими тӯй ба истифодаи на бештар аз 4 адад автомашина иҷозат дода шудааст.
Гуфта мешавад, то имрӯз ному насаби 6 ронандаи автомашинаҳои ин маросим муайян карда шуда, нисбати онҳо оид ба қонуншикании маъмурӣ парвандаҳо боз шудаанд ва барои муайян кардани моликони 15 автомашинаи боқимонда – иштирокчиёни қатораи автомашинаҳои маросими тӯйи мазкур тадбирҳо андешида мешаванд.
Зимнан зикр мегардад, ки нисбати домод Баҳром Азизовуи 26-сола низ дар бораи ҳуқуқвайронкунии маъмурӣ парванда оғоз гардидааст.
