Дар иҷлосияи имрӯзаи чоруми Маҷлиси вакилони халқи шаҳри Душанбе раиси пойтахт Маҳмадсаид Убайдуллоев ба вакилон дар бораи ҷараёни амалисозии барномаҳои иқтисодиву иҷтимоӣ дар зарфи 11 моҳи соли ҷорӣ ва иҷрои буҷети пойтахт дар ин давра гузориш дода, ҳамчунин оид ба нақша ва вазифаҳои мақомоти шаҳрдории Душанбе дар соли оянда изҳори назар кард.
Зимни суханронӣ раиси пойтахт таъкид дошт, ки тӯли 11 моҳи соли равон 440 корхонаи саноатии шаҳр ба маблағи умумии 1140,1 млн. сомонӣ маҳсулот истеҳсол кардаанд, ки нисбат ба ҳамин давраи соли гузашта 146,8 млн. сомонӣ зиёдтар аст.
Зикр гардид, ки тайи даҳ моҳи соли равон 36 адад иншооти нави саноатӣ дар пойтахт ба фаъолият шурӯъ намуда, 2 ҳазору 469 сокинони шаҳр бо ҷойҳои корӣ дар онҳо таъмин шуданд.
Раиси пойтахт ҳамзамон қайд кард, ки ба санаи 1 декабри ҳамин сол 9 ҳазору 337 шахсони ҳуқуқӣ – андозсупорандагон дар шаҳр ба қайд гирифта шудаанд, ки дар муқоиса бо соли гузашта 197 адад бештар мебошад.
Ҳамчунин изҳор гардид, ки имсол дар пойтахт 1 ҳазору 558 нафар соҳибкорони нави хусусӣ ба қайд гирифта шуда, ба санаи 1 декабр шумори умумии онҳо ба 30 ҳазору 53 нафар расидааст.
