– Ба ҳукумати Тоҷикистон таъмини устувории макроиқтисодӣ дар соли гузашта дар доираи барномаи зиддибуҳронии аввали соли 2015 қабулгардида муяссар шуд, – изҳор дошт муовини директори Маркази тадқиқоти стратегии назди президенти ҶТ Фарида Муминова.
Ӯ қайд кард, ки аввали соли 2015 ҳукумат нақшаи чорабиниҳо оид ба сабуксозии таъсири буҳрони ҷаҳонии молии иқтисодиро қабул кард, ки муддати тамоми сол амалӣ шуд.
Ба сифати далели «устувории макроиқтисодӣ» Муминова таъкид дошт, ки соли гузашта ба ҳукумат муяссар шуд, ки сатҳи таваррумро то 5% нигоҳ дорад, ҳарчанд аз рӯи натиҷаҳои сол дар сатҳи 7,5% пешбинӣ шуда буд.
Ҳамчунин ба қавли ӯ, дар доираи амалисозии нақшаи зиддибуҳронӣ тадбирҳо оид ба солимгардонии фаъолияти корхонаҳои давлатӣ, аз ҷумла ШСХК «Барқи тоҷик» ва Ширкати алюминии тоҷик низ ба иҷро расиданд.
Муминова қайд кард, ки боз яке аз самтҳои тарҳи зиддибуҳронӣ дастгирии фаъолияти соҳибкорон ва беҳбуди муҳити сармоягузориро дар бар мегирифт.
Ӯ таъкид дошт, ки дар рейтинги ахири Бонки ҷаҳонӣ – «Пешбурди тиҷорат «(Doing Buziness) Тоҷикистон мақоми назаррасро касб карда, тайи панҷ соли ахир ҷумҳурӣ дар ин рейтинг мавқеи худро ҳафт зина боло бурд.
Ба гуфтаи Ф.Муминова, ҳамчунин як қатор тадбиру иқдомҳо дар мавриди таъмини ҳифзи иҷтимоӣ ва шуғли аҳолӣ низ амалӣ шудаанд, ки аз самтҳои дигари барномаи зиддибуҳронии ҳукумат маҳсуб меёфт.
Дар маҷмӯъ, қайд кард ӯ, дар амалисозии барномаи зиддибуҳронӣ дар баробари дастовардҳо ҳамзамон мушкилоти муайяне низ вуҷуд доранд. «Ҳалли тамоми мушкилот дар муддати як-ду сол «ғайриимкон аст», – афзуд номбурда.
