Маркази робитаҳои ҷамъиятии Кумитаи давлатии амнияти миллӣ (КДАМ)-и Тоҷикистон овозаҳои мухталифро дар хусуси гӯё фирори як гурӯҳ кормандони Воҳиди махсуси зиддитеррористии «Алфа»-и КДАМ ҶТ дар ВМКБ аз ҷойи хизмат қатъиян рад менамояд.
Бино ба иттилои АМИТ «Ховар» бо такя ба маркази робитаҳои ҷамъиятии КДАМ ҶТ, кӯшиши мазкур аз тарафи гурӯҳҳои манфиатдори дохиливу хориҷӣ роҳандозӣ карда шуда, барои гумроҳсозии ҷомеа ва ташаннуҷи сулҳу субот дар мамлакат равона гардидааст.
Дар маълумоти расмии КДАМ ҶТ зикр мегардад, ки ҳоло тамоми ниҳодҳои зертобеи КДАМ ҶТ дар ҳолати муқаррарӣ ва бо назардошти риояи қатъии уҳдадориҳои хизматӣ фаъолияти касбии хешро идома дода истодаанд. «Бинобар ин, аз кулли шаҳрвандони кишвар хоҳиш карда мешавад, ки ба ҳар гуна овозаҳои бардурӯғ ва беасос бовар накунанд», – қайд мешавад дар маълумот.
Ёдрас мекунем, ки аз охири ҳафтаи гузашта овоза шуда буд, ки шаби 21 ба 22 январ як гурӯҳи иборат аз 11-12 нафар ҷангиёни Воҳиди махсуси зиддитеррористии «Алфа»-и КДАМ ҶТ, ки ба ВМКБ фиристода шуда буданд, аз ҷойи хизмат гурехтаанд. Зикр мегардид, ки ҷангиёни «Алфа» пурра бо аслиҳаи ҷангӣ макони будубошро тарк кардаанд.
