Дар кӯчаи Соҳилии пойтахт, паҳлӯи бозори «Султони Кабир» аквапарки болояш пӯшида сохта мешавад.
Тавре аз Иттифоқи меъморони Тоҷикистон ба «Азия-Плюс» дар ин робита иттилоъ доданд, лоиҳаи маҷмааи аквапарк аз ҷониби ширкати лоиҳакашии «Архпроект» таҳия гардида, сармеъмор Баҳром Юсуфов ва фармоишгар – соҳибкор Авазхон Кабиров мебошанд.
Дар озмуни эълоншуда оид ба интихоби лоиҳаи беҳтарини маҷмаа 12 корхонаи лоиҳакашӣ ширкат варзида, ҳакамони озмун тариқи овоздиҳии пинҳонӣ лоиҳаи «Архпроект»-ро беҳтарин эътироф намуданд. Ҳамаи иштирокчиён ҳар кадоме бо мукофотпулӣ дар ҳаҷми 1 ҳазор сомонӣ ва ғолиби озмун бо мукофопулӣ дар ҳаҷми 40 ҳазор сомонӣ қадрдонӣ шуда, ба таҳияи асноди кории лоиҳаи аквапарк ҳуқуқ пайдо кард.
Мувофиқи қарори раиси шаҳри Душанбе Маҳмадсаид Убайдуллоев, ба Авазхон Кабиров барои лоиҳакашӣ ва сохтмони бинои истеҳсолӣ бо 500 ҷойи корӣ (корхонаи дӯзандагӣ) ва бунёди аквапарк қитъаи замин ҷудо карда шуд.
Гуфта мешавад маҷмааи нави аквапарк бо риояи тобишу анъанаҳои миллии шарқӣ бунёд гардида, ба талабот ва меъёрҳои муосир ҷавобгӯ хоҳад буд.
Тарҳ (эскиз)-и аквапарки оянда
