Соли равон барои қарздиҳии имтиёзнок ба бахши тиҷорати вилояти Хатлон аз Фонди ҷамъиятии дастгирии соҳибкории назди ҳукумати ҷумҳурӣ ҷудо кардани ҳудуди 120 млн. сомонӣ дар назар аст.
Бино ба иттилои
хадамоти матбуоти
Кумитаи давлатии сармоягузорӣ ва идораи амволи давлатии ҶТ, зимни мулоқот бо соҳибкорони вилояти Хатлон муовини аввали нахуствазири ҷумҳурӣ Давлаталӣ Саид изҳор доштааст, ки соли гузашта Фонд аз ҳисоби воситаҳои буҷет ба 21 субъекти соҳибкории вилояти Хатлон дар ҳаҷми умумии 36,2 млн. сомонӣ қарзҳои имтиёзнок ҷудо кардааст.
Бо такя ба маълумоти оморӣ, Д.Саид таъкид доштааст, ки ба санаи 31 декабри соли 2015 дар ҷумҳурӣ беш аз 275 субъекти фаъолияти соҳибкорӣ ба қайд гирифта шудааст, ки нисбат ба нишондиҳандаи ҳамин давраи соли 2014 беш аз 32 ҳазор ё худ 12% зиёдтар аст.
Муовини аввали нахуствазири кишвар ҳамчунин зикр кардааст, ки дар вилояти Хатлон охири соли гузашта зиёда аз 87 ҳазор субъектҳои соҳибкорӣ ба қайд гирифта шудаанд, ки дар қиёс бо шумори онҳо дар ахири соли 2014 ба андозаи 9,6% бештар мебошад.
