Раиси вилояти Суғд Абдураҳмон Қодирӣ рӯзи 19 сентябр бо сафири ИМА дар Ҷумҳурии Тоҷикистон Элизабет Милард дидору гуфтушунид кард.
Бино ба иттилои хадамоти матбуоти раиси вилоят, зимни сӯҳбат Абдураҳмон Қодирӣ доир ба вазъи соҳаҳои гуногуни хоҷагии халқ маълумот дода, дар ин росто аз таҷдиди хоҷагиҳои кишоварзӣ, эҳёи анъанаҳои миллӣ, сохтмони шаҳракҳои нав, бунёди корхонаҳои саноатӣ ёдовар шуд.
Иттилоъ дода шуд, ки дар натиҷаи ислоҳоти соҳаи кишоварзӣ беш аз 40 ҳазор хоҷагиҳои оилавию инфиродӣ ташкил карда шуд ва дар натиҷаи ислоҳот теъдоди зиёди сокинон бо кор таъмин гардиданд ва ҳаҷми истеҳсоли маҳсулоти кишоварзӣ низ афзоиш ёфт. Эҳёи ҳунарҳои мардумӣ низ барои ҷалби бонувони хонашин ба ҳунаромӯзӣ ва пасон ба кор такони ҷиддӣ бахшид ва имрӯзҳо дар ҳар як ҷамоати шаҳраку деҳот марказҳои таълимӣ-истеҳсолӣ фаъолияти пурсамар доранд.
Илова бар ин ҳамасола даҳҳо корхонаҳои саноатӣ мавриди истифода қарор мегиранд ва теъдоди зиёди сокинон бо ҷои корӣ таъмин мегарданд.
Дар идомаи сӯҳбат Раиси вилоят хостори густриши робитаҳо дар бахшҳои гуногун, аз ҷумла кишоварзиву саноат гардида, омодагии роҳбарияти вилоятро дар ин самт изҳор дошт.
Дипломати амрикоӣ дар навбати худ аз истиқболи гарму самимӣ изҳори сипос намуд. Элизабет Милард омодагии ҷонибашро ҷиҳати густариши ҳамкориҳо дар бахшҳои соҳибкорӣ, кишоварзӣ, савдову хизматрасонӣ баён дошта, изҳори умед намуд, ки ҷонибҳо минбаъд низ барои тавсеи ҳамкориҳо иқдом менамоянд.
