Охири ҳафтаи сипаришула бар асари боришоти зиёд, ки ба фаромадани селу ярч ва сангпораҳо боис гардиданд, ба чанде аз ноҳияҳои кӯҳистони ҷумҳурӣ зиён расид.
Бино ба маълумоти Кумитаи ҳолатҳои фавқулода, бар асари сангфароӣ дар ҷамоати деҳоти Шотемури шаҳри Хоруғ як манзил қисман вайрон шуда, талафоти ҷонӣ ба қайд гирифта нашудааст.
«Бо талошҳои дастаи зудамали Ситоди КҲФ дар ВМКБ оқибатҳои офати табиӣ бартараф шуда, ҳамчунин сокинони 12 хоҷагӣ, ки зери хатари сангфароӣ қарор доштанд, ба ҷойи бехавф кӯчонида шуданд», – хабар дод котиби матбуотии КҲФ Умеда Юсуфова.
Номбурда иттилоъ дод, ки дар ноҳияи Темурмалик дар натиҷаи обхезӣ дар дарёи Сурхоб қитъаҳои замини се хоҷагӣ зарар дидаанд.
Дар деҳаи Сесангаи ҷамоати шаҳраки Обигарм бар асари боришоти зиёд хатари фаромадани ярч ба вуҷуд омада, кормандони Ситоди Кумита дар минтақаи Рашт бо мақсади омодагӣ ба офати табиии имконпазир бо аҳолӣ корҳои фаҳмондадиҳӣ гузарониданд ва аз мавзеъҳои бештар хатарнок сокинони 6 хоҷагии иборат аз 28 нафар ба ҷойи амн кӯчонида шуданд.
Ба хотири пешгирии зиён аз жола хадамоти марбутаи Кумтита бо истифода аз мушакҳои зиддижола 22 минтақаи дучори хатар аз жола дар қаламрави шаҳрҳои Ҳисору Турсунзода ва ноҳияҳои Хуросону Ёвон ва Данғараро безарар гардонид.
Зимнан зикр гардид, ки ҳайати шахсии Кумита дар ҳолати омодабош қарор дошта, дар ҳамдастӣ бо намояндагони Вазорати нақлиёт, мақомоти маҳаллии ҳокимияти давлатӣ ва Агентии обёрӣ корҳо оид ба мустаҳкам кардани соҳилҳои дарёҳо идома доранд.
