Федератсияи футболи Тоҷикистон (ФФТ) ба рӯйхати довталабони ҷоизаҳои AFC (Конфедератсияи футболи Осиё) дар соли 2017, ки 18-уми ноябр нашр гардид, дохил шудааст.
Бино ба иттилои Радиои Озодӣ, дар ин рӯйхат Федератсияи футболи Тоҷикистон ба номинатсияи “Созмони футболи миллии дар ҳоли рушди сол” (AFC Member Association of the Year – Developing category) шомил гаштааст. Ба ҷуз ФФТ барои ин ҷоиза федератсияҳои футболи Лубнон ва Ветнам довталабанд.
Маросими супурдани ҷоизаҳои AFC («AFC Annual Awards 2017»), ки дар он мавсими имсолаи футбол натиҷагирӣ шуда, лауреатҳои соли 2017 эълон мешаванд, рӯзи чоршанбеи 29 ноябр дар пойтахти Тайланд – Бангкок – баргузор мешавад. Федератсияи футболи Тоҷикистонро дар ин чорабинӣ Хуршед Мирзо, муовини аввали раиси ФФТ ва Анвар Мирзоев, раиси Федератсияи футболи Душанбе, намояндагӣ мекунанд.
Бояд гуфт, ки соли 2015 Федератсияи футболи Тоҷикистон барои ҷоизаи “Созмони футболи миллии дар ҳоли рушд” довталаб буд, вале ду сол пеш ин ҷоиза ба Ассотсиатсияи футболи Ҳонконг супурда шуд.
Соли 2014 бошад, дар маросими супурдани ҷоизаҳои Конфедератсияи футболи Осиё дар пойтахти Филиппин – Манила – Федератсияи футболи Тоҷикистон бо ҷоизаи президенти AFC барои рушди футболи кӯдакон ва футболи оммавӣ («AFC President Recognition Award for Grassroots Football») қадрдонӣ гардида буд.
Дар маросими супурдани ҷоизаҳои AFC дар Бангкок лауреатҳои соли 2017 аз рӯи бисёр номинатсияҳо эълон мешаванд. Аз он ҷумла, барои ҷоизаи “Беҳтарин бозигари Осиё” байни мардон се нафар – Ву Леи (Чин), Умар Хрибин (Сурия) ва Умар Абдулраҳмон (Имороти Муттаҳидаи Араб) ва миёни занон Саманта Керр (Австралия), Сунг Хиян Сим (Кореяи Шимолӣ) ва Кумагаи Саки (Ҷопон) довталаб мебошанд.
Инчунин барои ҷоизаи “Беҳтарин мураббии сол” байни мардон Анж Постекоглу (Австралия), Ишии Масатада ва Такафуми Хори (ҳарду аз Ҷопон), миёни занон Гао Хонг (Чин), Асако Такакура (Ҷопон) ва Летисиа Баутиста (Филиппин) довталабанд.
