Дар Душанбе ҷаласаи чоруми раисони китобхонаҳои миллии кишварҳои аъзои Созмони ҳамкориҳои иқтисодӣ (СҲИ) ба кор шурӯъ намуд.
Тавре аз Вазорати фарҳанги ҷумҳурӣ хабар доданд, ҷаласа дар бинои Китобхонаи миллии Тоҷикистон ҷараён дошта, то санаи 29 ноябр идома меёбад.
Гуфта мешавад, дар ин машварат роҳбарони Китобхонаҳои миллии 10 кишвари узви СҲИ – Тоҷикистон, Афғонистон, Озарбойҷон, Эрон, Қазоқистон, Қирғизистон, Покистон, Туркия, Туркманистон ва Ӯзбекистана иштирок доранд.
Дар ҷаласа масоили ҳамкориҳо миёни китобхонаҳои миллии кишварҳо ҳам дар сатҳи дуҷониба ва ҳам бисёрҷониба мавриди баррасӣ қарор дорад.
Ҳамчунин дар рафти машварат ба масъалаҳои табодули маълумот, эҳё ва барқарор кардани китобҳо, табодули таҷриба ва мутахассисон дар соҳаи китобдорӣ, имкони таъсиси сомонаи ягонаи китобхонаҳои миллии кишварҳои узви СҲИ таваҷҷуҳи хосса зоҳир мешавад.
