Ширкати сайёҳии ватании “Ориент Адвентур” бо ширкати сайёҳии “Lernidee Erlebnisreisen GmbH”-и давлати Германия ҳамкорӣ ба роҳ монда, ширкати мазкур аз кушода шудани роҳи оҳани Тирмиз — Бохтар хеле хушҳол шуда, тасмим гирифтаанд, ки моҳҳои июн, август ва октябри соли равон боздиди 3 гурӯҳи сайёҳонро, ки ҳар гурӯҳ зиёда аз 100 нафарист, тавассути ин ширкат бо хатсайри зикршуда ба Хатлонзамин ташкил намоянд.
Бино ба иттилои АМИТ «Ховар», вилояти Хатлон барои рушди сайёҳии экологӣ ва таърихию фарҳангӣ хеле мувофиқ буда, алахусус мақбараи Мир Саид Алии Ҳамадонӣ дар шаҳри Кӯлоб, Қалъаи Ҳулбук дар ноҳияи Восеъ, оромгоҳи Хоҷа Машҳаду мавзеи Чилучорчашма дар ноҳияи Шаҳритус, оромгоҳи Зайналобуддин дар ноҳияи Дӯстӣ, мазори Ҳазрати Султон дар ноҳияи Ховалинг, Шаршараи “Сари хосор” дар ноҳияи Балҷувон, Чилдухтарон дар ноҳияи Муъминобод ва даҳҳо дигар мавзеъҳо таваҷҷуҳи шумораи зиёди сайёҳони дохилию хориҷиро ҷалб месозанд.
Гуфта мешавад, айни ҳол, аз ҷониби Кумитаи рушди сайёҳӣ маводи зиёди иттилоотӣ аз нашр бароварда шудаанд, ки маконҳои тамошобоби вилояти Хатлонро фаро гирифта, тариқи ройгон миёни ҳаводорони сайру саёҳат паҳн гардида истодаанд.
Қобили зикр аст, ки ширкати сайёҳии «Lernidee Erlebnisreisen GmbH» тавассути қатора сайёҳонро ба Осиёи Миёна ва дигар кишварҳо барои саёҳат бурда, дар соҳаи сайёҳӣ таҷрибаи калон дорад.
Бори нахуст соли гузашта ширкати ватанӣ ба як гурӯҳи 100- нафараи сайёҳон, ки аксарияти онҳо аз Амрико буданд, бо хатсайри мазкур бо қатораи «ORIENT-SILKROADEXPRESS»–и ин ширкат хизмат расонид ва сайёҳон аз шаҳри бостонии Хуҷанд боздид намуданд.
