Барои азназаргузаронии ҳавопаймои таъҷилан ба фурудгоҳи Домодедово нишаста муҳандисон аз Душанбе ба Маскав сафарбар шуданд.
Бино ба иттилои котиби матбуотии ширкати ҳавопаймоии «Тоҷик Эйр» Азиз Хайруллоев, бинбар сабаби вайроншавии ҳавоногузарӣ (разгерметизасия) дар ҳавопаймои Boeing 737-300, ки бо хатсайри Маскав – Хуҷанд парвоз мекард, тасмим гирифта шудааст, ки ҳавопаймо ба фурудгоҳи Домодедово бармегардад.
«Ҳамаи мусофирон дар меҳмонхона ҷойгир шуда, бо ғизо севақта таъминанд. Ҳамаи масъалаҳои ҷории вобаста ба мусофирон фаврӣ ҳал шуданд», – гуфт ӯ.
Ба гуфтаи ӯ, муҳандисони барои санҷишу таъмир ба Маскав сафарбаршуда дар фурсати наздиктарин маълумоти муфассал пешниҳод карда, баъди азназаргузаронии дахлдори техникӣ парвоз тариқи ин хатсайр анҷом дода мешавад.
«Масъалаи парвози дубора то шом ҳал мешавад. Агар ҳавопаймо то он замон дуруст шавад, мусофирон бо ҳамин ҳавопаймо сафар мекунанд. Лекин агар то он вақт дуруст нашавад, бо дигар ҳавопаймо ба Хуҷанд фиристода мешаванд. Ин масъала айни замон мавриди ҳаллу фасл қарор дорад», – хабар дод Азиз Хайруллоев.
Ёдрас мекунем, ки бо сабаби ноқисиҳои техникӣ (герметизация) ҳавопаймои хатсайри Маскав – Хуҷанд таъҷилан ба фурудгоҳи Домодедово баргашт. Ҳавопаймои Boeing 737-300 ширкати Tajik Air соати 01:03 ба вақти Маскав парвоз карда, бо худ 141 нафар мусофир дошт.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
