Ширкати истеҳсоли техникаи маишӣ ва электроникаи Ӯзбекистон «Artel» ояндаи наздик ният дорад, ки истеҳсоли яхдонҳоро дар шаҳри Душанбе ба роҳ монад.
Тавре ба “Азия-Плюс” як манбаъ аз ҳукумати ҷумҳурӣ дар ин робита иттилоъ дод, ин қарордод байни ҷонибҳо дар ҷараёни сафари давлатии президенти Тоҷикистон Эмомалӣ Раҳмон ба Тошканд рӯзҳои 17-18 август ба даст омада буд.
ИЗОБРАЖЕНИЕ
Ояндаи наздик ҷониби Узбекистон ба таҳвили таҷҳизот ҷиҳати роҳандозии истеҳсолоти оянда дар Душанбе шурӯъ мекунад.
“Ба гумони ғолиб, истеҳсолот дар ҷойи собиқ корхонаи истеҳсоли яхдонҳо дар Душанбе, дар маҳаллаи Поитехникуми пойтахт ба роҳ монда шуда, ин масъала ва масъалаи иқтидори корхона имрӯз дар марҳилаи мувофиқасозӣ қарор дорад”, – гуфт манбаъ.
Қобили зикр аст, ки зимни сафари давлатӣ ба Ӯзбекистон Президенти Тоҷикистон Эмомалӣ Раҳмон аз корхонаи “Артел” дар шаҳри Тошканд боздид намуда буд. Ба ӯ иттилоъ дода буданд, ки дар корхона асосан барои хоҷагии халқи кишвар ва эҳтиёҷоти аҳолӣ таҷҳизоти барқӣ истеҳсол мешавад.
Майдони умумии корхонаи “Артел” 600 ҳазор метри мураббаъро фаро гирифта, аз 9 коргоҳи дар саросари кишвар амалкунанда иборат аст. Иқтидори истеҳсолии онҳо беш аз 5 млн. адад техникаи маишӣ ва 10 млн. адад чароғакҳои каммасрафро ташкил медиҳад.
Дар ин корхона дар маҷмӯъ 7400 нафар машғули кор буда, ба сурати умум 500 номгӯи маҳсулот истеҳсол мешавад. Маҳсулоти корхона ба як қатор кишварҳо, аз ҷумла Тоҷикистон, Озарбойҷон, Арманистон, Беларус, Гурҷистон, Қазоқистон, Қирғизистон ва дигар давлатҳо содирот мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
