Дар робита ба мушкили алоқа ва дастрасӣ ба интернет ва дигар хизматгузориҳо ширкати Tcell дар сомонаи расмии худ – tcell.tj эълон нашр кард.
Дар эълони ширкат қайд мешавад, ки аз соати 17:00 рӯзи 20.11.2018 то 21.11.2018 баъзе аз муштариёни Тcell бо сабабҳои новобаста аз Ширкат, мушкили дастрасӣ ба интернет ва зангҳои дохилиро дошта, мутахассисони ширкат барои дар зудтарин фурсат бартараф намудани мушкилӣ саъю кӯшиш намуданд.
“Ширкати Tcell аз шумо барои нороҳатӣ маъзарат мепурсад. Ташаккур барои дарки шумо!”, – омадааст дар эълон.
Гуфта мешавад, барои тамоми муштариёне, ки дар ин муддат мушкилии дастрасӣ ба хизматрасониҳои шабака ва интернетро доштанд, аз тарафи ширкат ҳамчун ҷуброн бастаи 300 мегабайт интернет ва 50 дақиқаҳои иловагӣ дар дохили Тоҷикистон пешниҳод карда мешавад.
Мутахассиси шуъбаи робита бо ҷомеаи ширкат Олга Завялова мегӯяд, мушкилӣ ба “нуқсону камбудиҳои техникӣ” вобаста буд.
“Ба ҳар кадоме аз муштариён дар бораи ҷубронпулӣ шахсан огоҳинома ирсол гардида, айни замон алоқа ва интернету дигар хизматрасониҳои ширкат дар реҷаи муқаррарӣ дастрас аст”, – илова намуд мутахассис.
Ёдрас мекунем, ки тақрибан соати 17:00-и дирӯз интернет аз Tcell қатъ шуд. Каме баъдтар алоқаи мобилӣ ҳам қатъ шуд. Муштариёни ширкат танҳо ба ҳамдигар занг зада метавонистанд, дастрасӣ ба дигар ширкатҳои мобилӣ ва телефонҳои корхонаҳову хонагӣ ғайриимкон буд.
Маркази хизматгузорӣ (Сall-center)-и ширкат дастнорас ва ҷавоб намедод, дар сомонаи расмӣ низ ҳеҷ маълумоте дар ин хусус нашр нашуда буд. Дар худи ширкат низ алоқа вуҷуд надошт ва маҳз бо ҳамин сабаб раҳбарияти Tcеll ба нашри эълони дахлдор дар сомонааш ва ирсоли паёмак (смс) имкон надошт.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
