Раиси Раёсати БДА “Амонатбонк” Сироҷиддин Икромӣ аз ҳамаи кормандони бахши бонкии кишвар даъват кард, ки музди кори якрӯзаи худро ба суратҳисоби махсуси дастгирии кормандони тиббӣ дар мубориза бо COVID-19 равона кунанд.
Худи Сироҷиддин Икромӣ дар пайравӣ ба раисҷумҳури Тоҷикистон маоши якмоҳаи худро ба ин суратҳисоб гузаронид.
Қобили зикр аст, ки Эмомалӣ Раҳмон аввали моҳ маоши якмоҳаи худро (маблағ зикр намешавад) ба суратҳисоби мубориза бо коронавирус гузаронд. Раисони вилоятҳои Суғду Хатлон ба ин амал пайравӣ карданд. Ҳайати раҳбарии ВКД низ 50%-и маоши якмоҳаи худро ба ин суратҳисоб равона кард.
Мувофиқи омори расмӣ, айни замон дар Тоҷикистон музди меҳнати кормандони низоми бонкӣ аз ҳама баландтар аст, ки ҳаҷми миёнаи моҳонаи он 3309 сомониро ташкил медиҳад. Ин қариб 3,7 баробар аз маоши миёнаи моҳонаи табиб, 5,5 баробар – аз маоши миёнаи моҳонаи ҳамшираи шафқат ва 7,2 баробар – аз маоши миёнаи моҳонаи парасторон (ходими хурди тиббӣ, санитарка) зиёдтар аст.
Маоши миёнаи моҳонаи табибон ба 896 сомонӣ ва ҳамшираҳои шафқат ба 607 сомонӣ баробар буда, парасторон дар як моҳ 460 сомонӣ музди меҳнат мегиранд.
Ҳамчунин барои пардохти иловапулӣ ба табибон аз Фонди захиравии президенти кишвар 12,4 млн сомонӣ маблағ ҷудо шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
