Ҳаҷми содироти тарбуз аз Ӯзбекистон ба хориҷи кишвар аз рекорди солҳои пешин бамаротиб зиёд шуда истодааст. Аз нимаи моҳи май то охири моҳи июн аз Ӯзбекистон ба кишварҳои хориҷӣ зиёда аз 63 ҳазор тонна тарбуз фиристода шудааст, хабар медиҳад Podrobno.uz.
Тибқи маълумоти пешакии Кумитаи гумруки ин кишвар, дар давраи аз 16 май то 30 июни соли 2022 Ӯзбекистон ба берун аз ҳудуди ҷумҳурӣ 63,4 ҳазор тонна тарбуз интиқол додааст, ки 3,1 баробар зиёдтар нисбат ба ҳамин давраи соли гузашта мебошад.
Агар ба назар гирифта шавад, ки дар ҳамин давраи солҳои 2018-2020 содироти тарбуз аз Ӯзбекистон ҳамагӣ ҳудуди 3 ҳазор тоннаро ташкил медод, пас ҳаҷми содирот дар якуним моҳ аз оғози мавсими имсола дар муқоиса бо нишондиҳандаи солҳои 2018-2020 беш аз 20 баробар зиёдтар аст.
Дар ҳамин ҳол, ҳудуди 99% аз ҳаҷми умумӣ ба бозори кишварҳои Иттиҳоди иқтисодии АвруОсиё (ЕАЭС) ва наздики 1,5%-аш ба бозорҳои чор кишвар фиристода шудааст: Тоҷикистон – 700 тонна, Муғулистон – 155 тонна, Украина – 42 тонна ва Латвия – 18 тонна.
Бино ба маълумоти иштирокчиёни бозор, ба ҳолати 1 июли соли 2022 вобаста ба навъу сифат ва минтақаи кишвар бидуни назардошти хароҷот ба навъбандӣ ва ба нақлиёт бор кардан, нархи хариди 1 кило тарбуз аз саҳро 500-100 сӯм (0,05-0,1 доллар)-ро ташкил медиҳад.
