Хоруғ. 12-уми март. ОИ «Азия-Плюс» – Дар моҳҳои январ-фервали соли ҷорӣ ҳаҷми интиқоли маблағҳои шахсони воқеӣ аз хориҷи кишвар ба Вилояти Мухтори Кӯҳистони Бадахшон қариб ба андозаи 900 ҳазор доллари амрикоӣ коҳиш ёфт.
Тавре муовини раиси ВМКБ Азиз Гиёев ба ОИ «Азия-Плюс» хабар дод, дар зарфи ду моҳи соли ҷорӣ ҳаҷми интиқоли маблағҳо ба вилоят беш аз 2 млн. 997 ҳазор доллари ИМА-ро ташкил дод, ки нисбат ба ҳамин давраи соли гузашта 898 ҳазор $ камтар аст.
А.Гиёев мегӯяд, коҳиши ҳаҷми интиқоли маблағҳо ба бӯҳрони молӣ ва бекор мондани муҳоҷирони меҳнатии вилоят дар Русия вобаста аст. «Имрӯз ба замми бекор мондани аксари муҳоҷирони меҳнатӣ, ба муҳоҷирони меҳнатии бо ҷойи кор таъмин муддати чанд моҳест, ки маош пардохта намешавад», – гуфт ӯ.
Тибқи маълумоти Раёсати Агентии ҳифзи иҷтимоӣ, шуғли аҳолӣ ва муҳоҷирати вилоят, беш аз 24 ҳазор ё 12 дарсади аҳолии ВМКБ дар хориҷи кишвар қарор доранд ва 23 ҳазори онон дар Русия кору зиндагӣ мекунанд.
