Моҳи феврали соли гузашта қарор дар бораи бекор шудани реҷаи раводид байни Тоҷикистон ва Эрон барои равуо тариқи ҳавопаймоҳо ба ҳамаи шаҳрҳо ба ҳукми иҷро даромад. Ба туфайли ин, омор чӣ гуна тағйир ёфт?
Ёддошт дар бораи бекор шудани реҷаи раводид байни кишварҳо дар ҷараёни сафари собиқ президенти Эрон Иброҳим Раисӣ ба Тоҷикистон дар моҳи ноябри соли 2023 ба имзо расид.
Тобистони соли 2024 ҳуҷҷатҳои дахлдор таҳия ва аз ҷониби парлумонҳои ҳарду кишвар маъқул дониста шуданд. Аз 10 августи соли 2024 реҷаи раводид миёни Душанбе ва Теҳрон бекор карда шуд.
Рӯзи 3 феврали соли соли 2025 қарор дар бораи бекор шудани реҷаи раводид байни Эрон ва Тоҷикистон барои парвоз ба ҳамаи шаҳрҳо мавриди амал қарор гирифт.
Аз ҳамон дам шаҳрвандони ҳарду кишвар, ки шиносномаи умумии шаҳрвандӣ ва хориҷӣ доранд, дар муҳлати 30 рӯз дар давоми давраи 90-рӯза метавонанд дар қаламрави кишварҳои ҳамдигар ҳузур дошта бошанд.
Қобили зикр аст, ки реҷаи бераводиди сафар танҳо ба равуо бо ҳавопаймо дахл дорад. Барои убури марз тариқи роҳи заминӣ ё кишварҳои сеюм, шаҳрвандони Тоҷикистон ва Эрон бояд рапводид ба расмият дароранд.
Чӣ натиҷа ҳосил шуд?
Бино ба маълумоти Кумитаи рушди сайёҳии Тоҷикистон, дар муқоиса бо соли 2024, ки теъдоди сайёҳон аз Эрон ба 6804 нафар баробар буд, соли 2025 он то 11 866 нафар афзудааст.
Фарқият 5062 нафар ё худ 74,3%-ро ташкил медиҳад. Ба ин тариқ, аз лиҳози вуруди сайёҳон ба Тоҷикистон, Эрон миёни 20-гонаи аввали кишварҳо мақоми 8-умро касб кард.
Дар зинаи аввал дар ин самт Ӯзбекистон қарор дорад.
Теъдоди вуруди сайёҳон аз Тоҷикистон ба Эрон низ зиёд шуд. Соли 2024 678 нафар ва соли 2025 – 938 нафар шаҳрвандони Тоҷикистон аз Эрон боздид кардаанд. Фарқият 260 нафар ё худ 38,35%-ро ташкил медиҳад.
Ғайр аз ин, имсол маълум шуд, ки нархи билети ҳавопаймоҳо дар Тоҷикистон барои ширкатҳои маҳаллӣ ва байнулмилалӣ поин рафт. Ба хатсайрҳо ба Эрон низ.
Акнун арзиши билетҳои ҳавопаймо барои ширкатҳои ҳавопаймоои ватанӣ ва хориҷӣ ба андозаи 25-30% поин рафт. Директори Агентии авиатсияи граждании кишвар Ҳабибулло Назарзода зикр кард, ки ин ба туфайли 40% тахфиф ба хидматрасонӣ, ки фурудгоҳҳои кишвар ба ширкатҳои ҳавопаймоӣ пешниҳод намуданд, инчунин зиёд кардани шумори хатсайрҳои ҳавоӣ дар доираи сиёсати “фазои “боз” муяссар шудааст.
