Татяна Москалкова, ваколатдори ҳуқуқи инсон (Омбудсмен)-и Русия мегӯяд, аз Эмомалӣ Раҳмон, раисҷумҳури Тоҷикистон ба номаи худ дар робита ба истирдоди 200 зани тоҷик, ки дар маҳбасҳои Русия адои ҷазо мекунанд, посухи мусбат гирифтааст.
Манбаъ аз номи ӯ навиштааст, ки ” гуфтааст, “занони маҳбуси хориҷӣ дар зиндонҳои Русия ба мушкилоти зиёд рӯбарӯ ҳастанд ва аз ҷумла наметавонанд саривақт хешовандони худро бинанд”.
Моҳи феврали имсол Умед Бобозода, ваколатдори ҳуқуқи инсон дар Тоҷикистон дар нишасти хабарии ин ниҳод аз номаи Москалкова ба унвони раисҷумҳури Тоҷикистон иттилоъ дода буд. Он замон теъдоди заноне, ки талаби истирдод карда буданд, беш аз 150 нафар гуфта мешуд.
Омбудсмени тоҷик гуфта буд, ки ин масъала нахуст ҳангоми сафари Москалкова ба Тоҷикистон, ки дар ҳошияи сафари президенти Русия ба Тоҷикистон омада буд, муҳокима шуда буд ва ӯ баъди ба кишвараш баргаштан “ба номи президенти мамлакати мо” дар хусуси истирдоди занони маҳбус аз Русия ба Тоҷикистон мактуб навиштааст.
Маълум нест, ки дар номаи ҷавобӣ мушаххасан чӣ гуфта мешавад ва ҳамзамон замони истирдоди занони маҳбус ба кишвари мо гуфта намешавад. Ҳамин тариқ, маълум нест, ки ин занон барои истирдоди худ ба Ваколатдори ҳуқуқи инсони Русия муроҷиат кардаанд ва ё ин ташаббуси худи ӯ аст.
Аммо Умед Бобозода дар нишасти хабарӣ ба омода намудани ҷой барои заноне, ки истирдодашон дар назар аст, ишора карда буд.
“Барои овардани онҳо мо бояд зиндонҳоро омода кунем, то онҳоро ҷо карда тавонем”, – гуфта буд ӯ.
Зимнан, тайи се соли ахир дар бораи табодули маҳкумшудагон байни Русия ва Тоҷикистон ягон маълумот ё омор расонаӣ нашудааст. Маълум нест, ки чӣ қадар шаҳрвандони Тоҷикистон дар Русия ва чанд шаҳрванди ин кишвар дар маҳбасҳои Тоҷикистон адои ҷазо мекунанд.
Тибқи иттилои ахир, ҳоло дар маҳсаби Норак 471 зан адои ҷазо мекунанд. Ҳамчунин, 11 кӯдаки то сесола ҳамроҳи модарашон қарор доранд. Кӯдакон то сесолагӣ дар инҷо бо модарошон мемонанд ва баъд аз он ба наздикони занон дода мешаванд.
